Nombre de fiches : 28 « Me dison Martin. E mos amics son de lops. Òc ben, de lops que los grands sabon pas veire ! Ne'n fau de causas ambe mos lops ! Mas quand serai grand... » Lo libre evòca amb tendresa e delicadesa, a nautor de mainatge, la question de l'amic imaginari. Illustrat amb finesa e una sensibilitat de las bèlas, abòrda tanben a son biais la question de la plaça dins la frairièra, quand òm i arriba après l'ainat. Mai que mai, pausa LA question essenciala : cossí far amb lo « abans ieu » ? Cossí acceptar que los autres ajan agut una vida abans nòstra venguda al mond ? L’autora, Corinne Lhéritier, espeliguèt entre Nimes e Cevenas, entre lo patoes dels grands, mitat amagat mitat enebit, e lo tornar a la lenga del paire. Es regenta a la Calandreta de Nîmes, çò que la buta a far de reviradas per la classa, puèi pel public. Aquò la ten plan pròcha de la literatura joinessa. Ensaja de cavar de longa las questions linguisticas, mai que mai a l’entorn de l’intercompreneson, tant coma las questions pedagogicas. Dins lo quotidian de la classa, parteja e transmet aquel amor de la lenga, per son usatge quotidian, e per una cabussada pregonda dins la literatura jos totas sas formas, en particular la poesia. Juliette Armanhac, l'illustratritz es, a çò que se ditz al sieu, nascuda amb un gredon dins la man… Viu e trabalha entornejada de natura e dempuèi totjorn son univèrs es poblat d'aventurièr.èras, de saunejaire.as, de bricolaire.as e de bèstias salvatjas. Formada a las Arts Aplicadas, a l'illustracion e a las Arts de la Scèna aima s'apropriar los espleches e materials que li tomban jos la man : fotografia, cordura, dessenh, copa lasèr, ceramica, per crear d'imatges ont imaginari e realitat s'entremesclan estranhament… Parteja son temps entre creacion, enquadrament de formacion e animacion de talhièrs per pichons e grands. De legir, per somiar e, lo ser, just abans que lo sòmi vos prenga dins sos braces …