« “Qui setz ?” demandet. La responsa se faguet esperar un pauc. “La que me faràn, respondet una votz de dròlla o de jòuna femna, sei passada dins la vita dau monde e degun m’a visda. Era res e sei demorada res. Era benleu un pauc mai. Qui pòt saber ? Degun m’a visda autrament e io sabe pus onte es la vertat. Segue la que me disiàn los aubres. Es benleu pas la bona. Benleu z’es jamai estada... L’ai seguda per çò que me semblava la mai brava. Rancure pas. Rancurarai jamai... mas mon Dieu que queu chamin es long...” » Micheu Chapduelh (prononciar: [sa’dyɛj]) es un escrivan e chançonier occitan nascut lo 7 de genièr de 1947 a Agonac en Dordonha ente demòra enquera. Es un daus prumiers escrivans occitans-lemosins a aver utilizat la grafia classica. Participa a la revusda Lo Leberaubre consacrada a la literatura fantastica emb Jan dau Melhau. Son òbra es un boiradís d’umor negre e de fantastic. Escrivet de nombrosas chançons, coma per Joan-Pau Verdier. Presidet longtemps Novelum, la seccion peirigòrda de l’IEO. Es membre del conselh lingüistic del Congrès Permanent de la Lenga Occitana.